Школярї ся представили інсценаціов Свадьбы минулости, де приближыли позерателям, як то было даколи на русиньскых свадьбах. Куртов, але милов рецітаціов свої мамкы потїшыли і школярї першой класы. О тім, же на нашій школї вырастать много будучіх танечників і співаків, участників акції пересвідчіло выступлїня школярїв танечного і співацького кружка. Красный ірьскый або рокенроловый танець, но і актуалный гіп-гоп роскрутили добру наладу наповно. Мелодії русиньскых народных співанок, але і словацькых модерных звучали в часї выступлїня не з єдных уст на сценї. Красна участь родічів і остатных жытелїв села свідчіла о тім, же орґанізованя подобных акцій буде наісто мати змысел і місце в нашім селї. Школярї і їх родічі будуть на тоты моменты все в добрім споминати.

Довго очекованым днём зачатку екскурзії была середа, 4. юн 2008. Кідь ся у вечернїх годинах при радваньскій школї заставив автобус повный польскых приятелїв, было ясне, же о забаву в слїдуючім тыжднї буде постаране.

Через тоты на путованя богаты днї школярї спознали Братїславу, главно історічну часть Старого міста. Міджі приємны моменты належала і навщіва выновленого термалного купалиска в Дунайскій Стредї. Завершінём путованя была дводенна навщіва прекрасной австрійской метрополы – Відня, де собі школярї попозерали штатный природознавчій музей, замок Гофбурґ, площу і храм св. Штефана, замок Шонбрун, ЗОО і ботанічну загороду і дїтьскый забавный центер Пратер. Ту ся вшыткы покохали панoраматічным поглядом з руського кола на цілу Відень. Чіслом містных атракцій і можностями пережываня вольного часу дїтей былы школярї і педаґоґы барз несподїваны.

Зачав новый школьскый рік, котрый буде зарівно і другым роком фунґованя уж спомянутого міджінародного проєкту. Учітелїв і школярїв обидвох партнерьскых школ чекать далша інтересна робота на містній і міджінародній уровни. Найінтереснїшов частковов актівітов проєкту бы мали быти дві десятьденны выміны школярїв. Є ся на што тїшыти...