„Не знали сьме, же єй ту плануюти дати,“ говорить директорка музею Валіка Мадярова. „Приходять к нам гостї і властници збірок Варголовых образів на дорогых автах, і не можеме їх охабити парковати за будовов, де стражны камеры не мають досяг і де не є дозор. Такы річі ся мають конзултовати допереду. Сьме з того скламаны. Думам, же веджіня міста зробило непрофесіоналный крок.“

Притім зряджователём Музею модерного уменя Енді Варгола є Пряшівскый самосправный край (ПСК). Будову, в котрій є музей, счасти властнить місто а єй музейну часть за коруну дало ПСК. Главныма ініціаторами створїня музею были Джон Варгола, Михал Бицко і Михал Цігларж.

Куратор музею (позн. ред.: главный куратор) Михал Бицко є і презідентом Сполочности Енді Варгола (СЕВ). Поставлїня споминаной транспортной значкы робітници музея видять як „продовжованя помсты“ пріматора Міджілаборець, Ладіслава Демка, як ся пише в Позіції СЕВ к новій значцї перед музеём.

 

ПО ЗНАЧЦЇ ПРИШОВ ДОДАТОК

 

Експозіцію Музею модерного уменя Енді Варгола творить сімдесят процент образів пріватных зберателїв а М. Бицко упозорнює, же кідь ся сітуація не змінить, можуть стягнути свої образы з експозіції. В тім припадї бы в музею зістало лем 31 штатных образів. Правда, затля ани єден з властників Варголовых робот так не реаґовав, але єден уж упозорнив на то, же „в такій сітуації може музею свої образы не пожычіть“.

За пару днїв ся обявив під значков дотаток, же заказ не платить про робітників музею і про тїлесно пошкодженых (калїкы).

 

ВІН І Я СЬМЕ НЕОСНОВНЫ

 

Михал Бицко твердить, же одколи Ладїслав Демко наступив до функції пріматора Міджілаборець, сітуація СЕВ ся комплікує. Подля М. Бицка, пріматор вєдно зо своїм сыном навщівили віцепрезідента Надації Енді Варгола про візуалне уменя в Ню Йорку – Джона Варголу і снажыли ся там здобыти про Демкового сына ліценцію на поужываня значкы Енді Варгол про пріватны дїла. Але не здобыли. Од тогды Джон Варгола скоро не комунікує зо Сполочностёв Енді Варгола. Доднесь, наприклад, СЕВ не дістала фінанчну підпору на освітны актівіты, котры їм тота надація 17 років посылала. „Не знам, што буде. Чую ся пониженый, уж стораз єм Джонови высвітлёвав, же з тов Демковов акціов сьме не мали ніч сполочне,“ говорить.

М. Бицко підкреслює, же ту іде главно о то, жебы ся так не ліквідовав Варголів музей. „З паном пріматором Демком не хочу вести войну, я і він сьме неосновны. Хочу лем, жебы Музей модерного уменя Енді Варгола міг у Міджілабірцях продовжовати у своїй роботї. Сьме приправлены хоцьколи подати помічну руку, але няй нашу сполочность беруть як суверенный субєкт.“

 

ГОРДО І БЕЗ ОДПОВІДЇ

 

Ендіом Варголом ся все рады пышыме. У філмі „Factory Girl“, котрый зображує бурливы односины міджі умелцём і молодов дївков, нам але Енді зась припомянув, же він ся зо словеньскым (русиньскым) корїнём аж так не гордив. Кідь своїй мамі представив свою партнерку, ганьбив ся за кажде материне неамерицьке ґесто і неанґліцьке слово.

Пріматор Ладїслав Демко є на Варгола, точнїше на походжіня ёго матери, тыж пышный. „В културнім жывотї Міджілаборець домінантным понятём є Енді Варгол і ёго уменя. Доволю сі твердити, же ёго мено мать звук нелем на Словеньску, але і в Европі, но і цілосвітово,“ презентує свій погляд на веб-сторінцї міста Пряшів.

Позіцію пріматора к актуалній сітуацію навколо музею ся нам не подарило здобыти...