На балї вшыткых гостїв особно привітав выконный секретерь Світовой рады Русинів як выконного орґану Світового конґресу Русинів – А. Зозуляк. Каждому при вступі было понукнуто погарик „острого“ і фалаток хлїба зо шмальцом, жебы знав, же є міджі Руснаками. Потім бал короткыма приговорами отворили три главны ту oсoбы – председа Світовой рады Русинів П. Р. Маґочій, пріматор міста Пряшова П. Гадярі і председа приправного выбору балу А. Зозуляк. Наслїдно заграла музика, котретно вокално-інштрументална ґрупа Проблем із Кружлёвой під веджінём Я. Шеміцера, і уж были першы нетерпезливцї на танечнім паркетї. З радостёв собі на зачатку гостї попозерали і выступлїня танечной ґрупы Дубрава з Пряшова. Потім ся уж лем танцёвало і співало, співало і танцёвало, бо кідь не грав Проблем, так грали гостї з Ужгорода – музично-співацька ґрупа Гудацька тайстра зо своїма членами В. Короленком, М. Бойком, М. Матолом і А. Свидом. Міджітым перервы выповняло темпераментне дуо, котре грало до „росторганя тїла“: акордеоніста І. Крета з гуслістом М. Новотным. Як то є звыком, ходили поміджі столы а люде вєдно з нима співали нашы русиньскы співанкы єдну за другов, ці то быв Русин, Словак або даякый „іношелець“. Пан акордеоніста бравурно супроводив гров і нашы три найвекшы звізды на небі русиньскых народных співанок – М. Мачошкову, А. Сервіцьку і А. Порачову, котры были золотым гвоздиком міджі выступаючіма. Но, жебы тот бал быв іщі „світовішым“, так на нїм ся лосовали: по перше, нелем найлїпша маска (выграв у ролї Горбача Я. Шандор), по друге, ціны в томболї (де главна ціна быв телевізор, котрый подаровав русиньскый подникатель М. Мнягончак із Гуменного), а на самый конець, і по третє – вступенкы, де П. Р. Маґочій вылосовав главну ціну цілого балу: красну червену Шкоду Фабію, котра на выгерцю чекала уж два тыжднї перед балом при входї до Дуклї. А же пятніця 13. є нещастный день? То є повіра, холем ся о тім могла пересвідчіти Р. Жілкова, котрій ключ од выгратого новенького авта передав часточный спонзор того авта – шеф фірмы Ш-Автосервіс із центром у Вранові над Топлёв – Я. Голуб. Самособов, же далшым „спонзором“ того авта были самотны участици балу, якы заплатили за листкы. А так панї Жілкова єдну пятніцю авто выграла, а на другу уж ся на нїм везла з Вранова домів. На тім місцї бы єм хотїв подяковати приправному выбору балу, а окреме „душі балу“, Аннї Сервіцькій, котра была всягды і при вшыткім, може ани минуту не обсидїла, просто лїтала як Ангел, в костімі якого співала і конферовала, а то вєдно з герцём Театру А. Духновіча у Пряшові В. Русиняком у ролї Чорта. Подякованя, окрем уж спомянутых, належыть і далшым спонзорам того балу, котры приспіли фінанчно або конкретныма цінами про найлїпшы маскы ці до томболы: Світовому конґресу Русинів, М. Джупінкови з Тренчіна, фірмам: „Frank“ із Кошіць, „Nábytok JOMA“, „Poisťovňa Uniqa“, „Salón-Masáže u Viery“, „Pozemné stavby, s. r. o.“, „Allianz – Slovenská poisťovňa“, „Svet čokolády“ (Ф. Гамарова) із Пряшова, „Valosun“, „Video Rohaľ“ із Бардеёва, Я. Романчакови з Будковець, председкынї окресной орґанізації ГЗДС у Мигалївцях В. Ельковій, М. Пірникoви із Пряшова і русиньскій малярьцї з Пряшова – З. Осавчуковій-Гапаковій. Вшыткым іщі раз дякуєме а віриме, же при 2. світовім русиньскым балї у Пряшові, кідь ся найде добрый тім орґанізаторів, буде добрых спонзорів іщі веце. В такім припадї – увидиме ся зась за рік... То было желанём і вшыткых спокійных участників тогорічного русиньского балу в Пряшові.
|