Новинкы • Noviny • News 43/2013

• Одышов у вічность Стефан Пю

  Смутна спава пришла з Дейтону, штат Огаё (США). 8. октобра 2013 скінчів ся жывот цїнного чоловіка Стефана Пю (Stefan M.Pugh) – науковця, доброго знателя русиньского языка.

• Книжный юбілей О. Кудзея

  Писатель Осиф Кудзей (24. 2. 1952) із Няґова є знамый як перекладатель реліґійной літературы з церьковнославяньского языка до русиньского літературного языка на Словеньску, автор духовной поезії і баёк. Выдав дотеперь як літератор найвеце своїх зборників баёк – шість. Тота послїдня вышла в тых днях під назвом Сміх через слызы (Пряшів: Академія русиньскойкултуры в СР, 2013).

• Навернутя до будучности

  Світова рада Русинів, підписана єй председом Дюром Папуґом, загнала владї Україны підпорне писмо, де, окрім іншого, вызывать Україну, жебы дотримовала европскы договоры і харты і вызнала русиньску народностну меншыну із вшыткыма правами, якы выпливають з европскых документів. Писму бы ся чоловік годен быв потїшыти, кібы не выкликало вопросы о незналости і некомпетентности дакотрых членів Світовой рады, або мінімално єй председы, котрый ся під нього підписав. Але може є вшытко інакше.

• М. Мачошкова в США і варила галушкы

  Найзнаміша русиньска народна співачка Марія Мачошкова і далша знама русиньска співачка Беата Беґеніова-Федорюк ся споїли на своїм першім турне по великых америцькых містах. Допроваджаны были знамым акордеоністом Осифом Пірогом з Пряшова. Є то по першый раз, што ся тоты дві співачкы обявили довєдна по скоро 20 роках од часів, коли звыкли співати в рамках різных культурных акцій на Словакії. Нїґда передтым ся тоты дві умелкынї не обявили довєдна в Споєных штатах америкы. Турне тримало од 5. септембра 2013 до 22. септембра 2013, несло ся під назвов Марія Мачошкова на концертї. Концерты были зоеґанізованы в містах Вашінґтон, Пітсбурґ, Клівленд, Ню Йорк і Мінеаполіс. Проєкт орґанізовала фундація Джона і Гелены Тімовых зо Споєных штатів Америцькых.